在不能剪髮的日子，不少髮型師紛紛出動，上門為人剪髮。但原來早在 2014 年，便有位髮型師成立義剪團隊，上門服務有需要人士。
80 後的 Alex 中學時代於工業學校度過，畢業後希望一技傍身，在「揸菜刀」與「揸剪刀」之間選了後者。他笑言最初以為一入行就可以剪髮，後來才知道要從洗頭學起，三年後終於如願當上師傅。
眼見初入行的髮型師需要不同「頭型」來練習，「如果升師傅理想係要儲 100-200 款頭，又有無咁多朋友可以幫手呢？」恰巧知道家庭醫生會在業餘時間為人義剪，靈機一動：既然髮型師時間彈性，不如就在休息日去義剪，既能讓髮型師有剪髮及與人溝通的機會，又可以把手藝回饋社會，一舉兩得。
沒料到首次登門造訪老人院舍便摸門釘。Alex 笑說：「我嗰時個頭紫色嘅，個 junior 個頭金色嘅，仲有一身紋身，人哋見到就即刻話負責人唔喺度！」後來為免誤會，他便於 2014 年成立義工團體「易剪義」，成為髮型師與各大院舍之間的橋樑。
現時逾 100 名成員中，有來自五湖四海的同業，每次出動人數不定。服務對象也由長者開始，延伸至少數族裔、特殊教育需要學童、戒毒人士、更生人士等。「即使未必每次係同一位髮型師去，都想定期去表達關懷。」義剪時，就如朋友一樣相處、聊天。
為人剪髮，也剪走自身偏見。「義剪接觸到好多其他人眼中被標籤嘅人，髮型師何嘗唔係俾人標籤？」在入行以前，他印象中的髮型師都是「食煙、賭馬、鬼五馬六」，直到接觸以後才打破以往的印象。「而家唔會再帶前設去望任何人，唔會將唔關事嘅兩點連埋一齊。」
幽默又樂觀的他，點子很多。自從成立「易剪義」，他彷彿打開一個新視覺，開始舉辦義剪班、分享會、開設無障礙髮型屋⋯⋯ 見到不同需要便行動，按所有的資源盡善盡美。小時候父親教他「施恩莫望報」，彷如一顆種子落在他的心上。多年以後，他終於享受到純粹的助人之樂。
FB：易剪義
撰文：蒲 @appleee.cheng
攝影：蒲、受訪者提供
＿＿＿＿＿＿＿＿＿＿＿＿＿＿＿＿＿＿＿
活過不白過
Follow us on IG：https://bit.ly/2yjkquY
